حبيب قلبي
الأحد، 3 مايو 2009
طبعا كلنا عارفين ان يوم 4 مايو هو عيد ريسنا المصون
عايزين نهنيه بقى ونقوله كل اللي في نفسنا
ماتخافوش
انا هبتدي واهنيه واقوله قصيدة هي مش من تاليفي
لكن فيها كل اللي بيدور في نفسي
القصيدة كتبها الشاعر الكبير احمد فؤاد نجم
سيدي الرئيس
في عيد ميلادك الكام وتمانين
كل سنة وانت طيب
واحنا مش طيبين
كل سنة وانت حاكم
واحنا محكومين
واحنا مظلومين
واحنا متهانين
*************
ويا ترى يا حبيب الملايين
فاكرنا ولا احنا خلاص منسيين
فاكر المعتقلين
فاكر الجعانين
فاكر المشردين
فاكر اللي ماتو محروقين
فاكر الغرقانين
*******************
الله يكون في عونك - ها تفتكر مين وللا مين
في عيد ميلادك الكام وتمانين
بقول لك كلمتين
الأوله
ليلتنا طين
وهل تعلم أن النيل بقي رشاح
والجو أصبح بيئة والعيشة ولعة
والشرفا قلوبهم عالبلد والعة
وانت عاملهم مذبحة ولا بتاعة القلعة
والإقتصاد سداح
والسرقة بقت كفاح
وم صر متاحة بس للسياح
وعرض البلد بقي مستباح
*******************
والثانية
ورتنا الويل
دا الخطوة في عهدك بقت ميل
والضحك بقي نواح وعويل
والكوسة
عارف الكوسة
ممكن أقول لك فيها مواويل
والجامعة بقت يا إما كباريه أو دار مسنين
والشباب معظمهم من غير خمرة سكرانين
والعلم عز علي المتعلمين
والأساتذة بقم دجالين
والقادة بقم طبالين
واديني في الهايف يا حبيب الملايين
*******************
والثالثة
عارف اليابانيين
زمان في سنة اتنين وخمسين
كان عندنا تروماي وكان عندنا علم ومتعلمين
وثقافة ومثقفين
وأدبا وعلما وفنانين
وكانو اليابانيين
بالنووي لسه مضروبين
وللصدقة مستحقين
دلوقتي إحنا فين وهما فين
هما فوق واحنا في أسفل سافلين
*******************
والرابعة
أمن بلدنا بقي تنين
والمحاكم اتملت مظالم
والعدالة بقت كمالة
وكلمة الحق في الزبالة
وأصحابها في الزنازين
********************
والخامسة
القطاع العام....عام
والفساد.! ....ساد
وفي جتة بلدنا بيرعي
أفتكر لجنابك إيه وللا إيه
وكل ذكري ليك بدمعة
آآآآآآآآه آآآآآآآآه
**************
أنا كنت حالف مية يمين
أكملهم لك اتنين وتمانين
بس ها كفيهم ورق منين
وكل سنة وانت ..............
واحنا طيبين
*****************************
المشاركات
بارك الله فيك, ونفع بك أمته, لكنا نود أن نرى كتابتك أنت.
جزيت خيرا اخي كتاباتي في ارشيف المدونة وعرضت منها احرار في دنيا العبيد فهي من تاليفي وانتظر المزيد..
ماشاء الله
احرار ف دنيا العبيد تاليف حضرتك؟؟
ماشاء الله
ربنا يوفقك يارب.......
ايون من تأليفي يافندم
يارب..
جزاكم الله خيرا ع مروركم..